Галоўная / Навіны / Навіны рэгіёна
06.12.2022

Таварыства "Веды" і фонд "Гістарычная памяць" падпісалі пагадненне аб супрацоўніцтве

Таварыства "Веды" і фонд "Гістарычная памяць" падпісалі пагадненне аб супрацоўніцтве, перадае карэспандэнт БЕЛТА.

Подпісы пад дакументам паставілі старшыня праўлення РДГА "Веды" Вадзім Гігін і дырэктар фонду "Гістарычная памяць" Аляксандр Дзюкаў.

"Беларускае таварыства "Веды" і фонд "Гістарычная памяць" зыходзяць з узаемнай зацікаўленасці ў сумесным развіцці навукова-даследчага, адукацыйнага, асветнага і інфармацыйнага патэнцыялаў бакоў, у тым ліку ў распрацоўцы і ўкараненні актуальнай інавацыйнай прадукцыі, правядзенні сумесных мерапрыемстваў, рэалізацыі адукацыйных, асветных праграм, даследчых праектаў, падрыхтоўцы кваліфікаваных кадраў", - адзначаецца ў пагадненні.

У мэтах узаемнага садзейнічання ў вырашэнні статутных задач бакі дамовіліся прадастаўляць адзін аднаму тэхнічную і кансультатыўную дапамогу, абменьвацца інфармацыяй, удзельнічаць у сумесных даследчых, адукацыйных і інавацыйных праектах, іншых формах супрацоўніцтва.

Як адзначыў Вадзім Гігін, у таварыства "Веды" ўжо ёсць вопыт супрацоўніцтва з фондам "Гістарычная памяць". "Гэта перш за ўсё правядзенне сумесных канферэнцый. Пройдзе канферэнцыя да 2 красавіка - Дня яднання народаў Беларусі і Расіі. Мы думаем аб правядзенні даследчых праграм. Гэта магчымае выданне кніг, таму што мы плануем пры падтрымцы нашых калег аднавіць выданне бібліятэчкі таварыства "Веды". Мы бачым, што ёсць запатрабаванасць. Гэта цалкам канкрэтныя праекты", - падкрэсліў ён.

"Я бачу вялікае поле для супрацоўніцтва і ў выдавецкай дзейнасці, і ў правядзенні публічных мерапрыемстваў з удзелам беларускіх і расійскіх гісторыкаў. Падыходы да гісторыі, гістарычнай памяці дзвюх краін цалкам ідэнтычныя. У нас няма ніякіх спрэчак па гэтым пытанні, і мы проста аб'ядноўваем свае намаганні, - дапоўніў Аляксандр Дзюкаў. - Разам можна зрабіць больш, чым паасобку".

Паводле яго слоў, таварыства "Веды" - частка яго сямейнай гісторыі. "Калі мой прадзед выйшаў у адстаўку, ён працаваў у тым ліку лектарам таварыства "Веды", расказваў пра падзеі Вялікай Айчыннай вайны, выступаў з лекцыямі і ў Беларусі. Таму для мяне вялікі гонар цяпер вітаць 75-годдзе беларускага таварыства "Веды", - адзначыў Аляксандр Дзюкаў. - Фонд "Гістарычная памяць" на працягу ўжо амаль 15 гадоў супрацоўнічае з беларускімі гісторыкамі, з Інстытутам гісторыі Нацыянальнай акадэміі навук, беларускімі архівістамі. У гэтым годзе завершаны выпуск фундаментальнага шасцітомнага зборніка дакументаў "Без тэрміну даўнасці", у рамках якога па кожнай вобласці Беларусі існуе падборка дакументаў, а таксама інфармацыя аб усіх спаленых вёсках, канцлагерах, аб усіх карных аперацыях. Гэта быў, сапраўды, вялікі праект. Прадстаўнікі нашага фонду ўдзельнічаюць у рабоце дыялогавых пляцовак, якія працуюць у Беларусі і ў рамках якіх абмяркоўваюцца нацысцкія злачынствы, генацыд беларускага народа. Літаральна некалькі тыдняў таму мае калегі ўдзельнічалі ў рабоце такіх дыялогавых пляцовак у Гродне і Магілёве. Тыдзень таму ў свет у Мінску выйшла адразу тры зборнікі дакументаў аб злачынствах нацыстаў і іх памагатых. Гэтыя кнігі ўвайшлі ў план выпуску сацыяльна значных выданняў Міністэрства інфармацыі Рэспублікі Беларусь, і цяпер яны размяркоўваюцца па бібліятэках краіны. Для нас гэта сапраўды важна".

Супрацоўніцтва фонду "Гістарычная памяць" з беларускімі калегамі - канструктыўнае, дадаў яго дырэктар. "14 снежня мы сумесна з Інстытутам гісторыі і пад эгідай Пастаяннага камітэта Саюзнай дзяржавы плануем правядзенне канферэнцыі па сучаснай гістарычнай памяці нашых краін. І мы, вядома, будзем вельмі рады, калі таварыства "Веды" і яго прадстаўнікі прымуць удзел у гэтай канферэнцыі. 15 снежня на базе Інстытута гісторыі плануецца міжнародная канферэнцыя, у якой гісторыкі Расіі і Беларусі, можа, і з іншых краін будуць абмяркоўваць пытанні, звязаныя са стогадовым юбілеем Савецкага Саюза. Ёсць і іншыя планы, у тым ліку па ўзаемадзеянні з таварыствам "Веды". Мне вельмі хочацца правесці ў Беларусі фестываль "Лічбавая гісторыя", які паспяхова праводзіцца ў Расіі. Такі фестываль, на мой погляд, будзе вельмі карысны і цікавы і беларускай аўдыторыі, - канстатаваў ён. - Гэта значыць, прастора для супрацоўніцтва вялікая, і я спадзяюся, што яно будзе цесным і дружалюбным".-0-

БЕЛТА - Навiны Беларусi